María do Carme Adán Villamarín, deputada do Grupo Parlamentar do Bloque Nacionalista Galego (BNG), ao abeiro do disposto no Regulamento da Cámara, formula a seguinte Pregunta para a súa resposta escrita. Desde fai décadas o concello de Redondela, igual que outros moitos concellos do país, sufre a pegada de Unión Fenosa. Os montes do concello están atravesados por numerosas liñas eléctricas, sendo paradigmático o caso da parroquia de Quintela, cruzada por varias de media e alta tensión, ou o caso dun espazo de alto valor arqueolóxico, como o de Monte Penide, onde a instalación das torretas esgazou algúns petróglifos da zona. No casco urbán de Redondela, Cesantes, Chapela, existen numerosas instalacións que na actualidade están mal ubicadas.

A pesar destes prexuízos, a empresa mantén uns cortes de subministro inasumíbeis para os veciños e veciñas. Xa en xullo de 2014 denunciouse un importante corte de subministro que afectou ás parroquias de Saxamonde e Negros, e parte de Quintela, Vilar e Cabeiro. No seu día, o grupo municipal do BNG solicitou información ao goberno municipal sobre os motivos, e dilixenzas tomadas, sen que houbera ningún tipo de resposta. En novembro do mesmo ano, volveu a producirse un novo fallo, afectando neste caso, a unha importante parte do casco urbán de Redondela, Reboreda e Cesantes. Como daquela, a calada foi a resposta do goberno municipal, ante as demandas de explicacións.

No 2015, as cousas parece que van seguir polo mesmo camiño. O domingo 17 de xaneiro, producíronse varios fallos no subministro afectando a vivendas e alumeado público na parroquia de Saxamonde. Restableceuse para as casas, manténdose o público sen luz toda a noite, nos barrios de O Souto e Padrón. Na noite seguinte volveu a producirse un novo corte que afectou durante uns minutos a grande parte de Saxamonde, Quintela, Negros e Cedeira.

Segundo a lexislación actual a continuidade no subministro vén determinada polo número e a duración das interrupcións. As interrupcións poden ser imprevistas ou programadas, para permitir a execución de traballos programados na rede, en cuxo caso os consumidores e consumidoras deben ser informados dos mesmos. A determinación da continuidade do subministro, determinado polas interrupcións do mesmo, baséase en dous parámetros: o tempo de interrupcións e o número de interrupcións. A empresa estará obrigada a que as interrupcións non superen os tres minutos, para o cal debe xestionar diversas compensacións.

Diante disto o Grupo Parlamentar do BNG formula as seguintes preguntas para a súa resposta oral en comisión:

1. Que coñecemento ten o goberno dos continuos cortes de enerxía eléctrica no concello de Redondela?

2. Considera o goberno que a empresa debe establecer medidas compensatorias para diante dos cortes no subministro?

3. Que medidas vai adoptar o goberno para que deixen de producirse cortes de subministro en todo o país?

Santiago de Compostela, 6 de febreiro de 2015

Asdo.: Asdo.: María do Carme Adán Villamarín

Deputada do G.P. BNG

090033290