O BNG considera a constitución dos Consellos Parroquiais, unha auténtica “chapuza” do goberno de Bas

O BNG considera a constitución dos Consellos Parroquiais, unha auténtica “chapuza” do goberno de Bas

Para a nosa organización, a conformación dos mesmos non ten nada que ver co aprobado inicialmente.

No Pleno da Corporación de outubro de 2011, a través da concelleira de Participación Cidadá, Erminda Quelle, o goberno municipal propuxo a creación de nove Consellos Parroquiais: Cabeiro, Cesantes, Cedeira, Negros, Quintela, Saxamonde, Trasmañó, Ventosela e Vilar, amparándose no Regulamento  dos Consellos Parroquiais. En contra do criterio defendido pola organización nacionalista, pretendeuse botalos a andar sen ter feito un traballo previo con asociacións e colectivos parroquiais.

Pasou ano e medio dende dito Pleno, e para o Grupo Municipal do BNG certifícase unha vez máis que o goberno de Javier Bas pretendía unicamente “cubrir o expediente”. Segundo palabras dos nosos representantes no concello, “foi tempo suficiente para poñer en marcha ditos Consellos e dinamizar a actividade parroquial por medio dos colectivos e asociacións”.

 

Constitucións irregulares

Tal e como expresara no propio Pleno a voceira nacionalista Cecília Pérez, “o BNG non vai a apoiar esta fórmula dos Consellos Parroquiais por decreto. Cómpre primeiramente un traballo de formación e concienciación para que xurda dende o propio movemento asociativo a necesidade de constituílos e se valore positivamente o papel do propio Consello na vida municipal”. Nese mesmo Pleno, advertiuse que “cumpría unha adaptación da normativa dos Consellos á propia dinámica parroquial”.

Facendo ouvidos xordos, e amosando un total desprezo por unha verdadeira participación veciñal a través dos Consellos Parroquiais, apostouse por manter o mesmo formato para todos. Mesmo naquelas parroquias onde non existen centros educativos contábase con representantes das ANPAs.

Os temores do BNG vense agora confirmados posto que o aprobado polo goberno de Javier Bas, e apoiado polo Partido Socialista e a Agrupación de Electores, pouco ou nada teñen que ver cos Consellos actualmente vixentes.

Como exemplo, o Consello Parroquial de Vilar, onde tanto as Asociacións deportivas como culturais pasaron de 1 a 2 membros cada unha; creouse unha nova representatividade de Festas e de Cemiterio con 1 cada un; ademais dos e das representantes dos grupos políticos. Un caso similar ao de Trasmañó, onde de 2 representantes de Asociacións Culturais pasouse a 3 ao igual que a representatividade da Comunidade de Montes; eliminouse a representante de ANPAs; dotándose cun membro o colectivo que traballa a prol da Muller.

Todas estas modificacións e axustes foron tomadas de xeito unilateral polo goberno municipal, sen contar cos grupos da oposición.

 

Cedeira, Cesantes e Saxamonde, os casos máis graves

A nefasta xestión levada a cabo polos responsábeis municipais obrigounos a levar a Pleno a modificación dos Consellos Parroquiais de Cedeira e Cesantes. No primeiro caso houbo que aumentar a representatividade das AA.VV e do Centro Cultural a 3; e de Augas a 2. En total 17 persoas conforman este Consello Parroquial.

No caso do Consello Parroquial de Cesantes a AA.VV. e Asociacións deportivas quédanse con 2 representantes; as Asociacións Culturais chegan a 4; créase a representatividade de colectivos vinculados co mar con 2; namentres que Comunidade de Montes e  ANPA mantéñense con 1.

En canto ao Consello Parroquial de Saxamonde, a día de hoxe os mandatarios municipais non foron quen de poñelo en marcha.

“Estes continuos cambios sen criterio, e mesmo sen informar á oposición de todo o procedemento, certifican a escasa ou nula vontade do goberno de Javier Bas pola participación activa das entidades e colectivos parroquiais na vida municipal”.

A pesares de que non lles quedou máis remedio que rectificar na conformación dalgúns deles, o goberno municipal amosa un desprezo absoluto polo seu peso nas diferentes parroquias.

Dende o Bloque Nacionalista Galego sinalamos ao alcalde Javier Bas como principal responsábel deste proceso que consideramos de auténtica “chapuza”. “A súa falla de criterio en canto ao papel do movemento asociativo na vida municipal leva a que o seu goberno teña aprobado algo que despois non cumpre”.

O BNG avoga por reconducir a situación, volvendo a debatela en Pleno, para que queden formalmente constituídos os Consellos Parroquiais.

O BNG considera a constitución dos Consellos Parroquiais, unha auténtica “chapuza” do goberno de Bas