No Pleno de outubro a voceira do BNG acusou ao goberno galego de calar ante a desfeita á que somete Europa aos nosos mariñeiros. Considerou que soamente a mobilización na rúa e a actuación política puideron deter as intencións da UE de rematar cunha arte de pesca artesanal como a do xeito.

Iniciou a súa intervención defendendo a moción presentada polo presidente da Confraría, Clemente Bastos. “O sector do mar en Redondela, constitúe a empresa máis importante do concello”, para recordar que “cando en Galiza alguén fala de montar unha empresa, a Xunta mobiliza todos os seus recursos, mais cando se agrede aos mariñeiros, cala”.

Defendeu a moción do BNG, como un compromiso acadado cos mariñeiros de Redondela. Remarcou que, “aínda que quen toma a iniciativa é a Unión Europea, son os propios estados quen reparten as cotas”, para máis tarde sinalar que “namentres noutras zoas do Estado os gobernos presionaron ao Ministerio, en Galiza o goberno Feijóo calou”. Puxo enriba da mesa os nomes dos responsábeis desta situación, o presidente da Xunta, e a conselleira do mar Rosa Quintana. No momento no que os principais afectados véndose desprotexidos polas diferentes administracións, inciaron as mobilizacións o Partido Popular reaccionou.

Cecilia Pérez defendeu ao longo da súa intervención o xeito como unha arte de pescar tradicional, respectuosa e con futuro para os mariñeiros. “No canto de pedir subvencións para despezar barcos, débese investir na recuperación das nosas rías para que a pesca de baixura teña futuro”.

Noutro momento a voceira nacionalista botoulle en cara ao concelleiro, Miguel Ángel Ballesteros, que unicamente se referiran á problemática dos mariñeiros como responsabilidade de Europa. “Se se chega a esta situación é por decisións políticas. Nós somos políticos, actuamos en política, e a situación créase por iniciativas políticas”, aclarou aos asistentes, que convocados á sesión plenaria estiveron presentes nesta ocasión ao Multiusos de A Xunqueira.

Non se sentía nada cómodo o equipo de goberno coa moción presentada polo BNG. Ante os argumentos do PP, de que compartían a preocupación dos afectados, Cecilia Pérez botoulles en cara “que o goberno de Javier Bas chegara tarde a abandeirar as demandas deste colectivo”. O propio alcalde pretendía coartar a posibilidade dunha terceira intervención da voceira nacionalista.

Finalmente as dúas mocións presentadas foron apoiadas por unanimidade polo Pleno da Corporación.