O Partido Popular renuncia á elaboración do PXOM.

A transcendencia do debate dos orzamentos para o ano 2013, reside en que por vez primeira, concrétase a verdadeira estratexia do goberno de Javier Bas. Xa non existen as ataduras dos orzamentos prorrogados do 2010, nin as “situacións de emerxencia” do 2012. Agora pódese constatar realmente a estratexia a seguir.

Tendo en conta isto, cómpre recordar, que é na acción de goberno diaria onde se efectivizan as diversas partidas orzamentadas. Os orzamentos, constitúen un importante documento de carácter económico. A xestión do goberno exprésase no día a día.

Quedou patente nas diferentes intervencións, que a concelleira de facenda somentes se limitaba a recoller as propostas do resto de membros do goberno municipal. Non existe grande coordinación, ou directrices que marquen unha liña clara a seguir.

Nas diferentes intervencións que a voceira do BNG, Cecilia Pérez fixo no Pleno do 4 de xuño, referiuse á dotación para a elaboración do Plan Xeral de Ordenación Municipal. Neste apartado somentes se recollen 26.000€. Constátase a renuncia do equipo de Javier Bas á elaboración deste importante instrumento de ordenación urbanística.

Sorprende que habendo un concelleiro de urbanismo, que practicamente debería adicarse e poñer os alicerces desta cuestión, non se faga absolutamente nada. Descoñécese ata agora o pulo que puido dar Arturo González nesta cuestión de primeira necesidade para Redondela.

Mais si que cumpre en parte o PP, co xa manifestado na precampaña do 2011, que non ían a dar feito o PXOM, nun mandato.

Fixo referencia igualmente a voceira nacionalista á dotación para Orzamentos Participativos (162.000€). Tendo en conta que se trata dunha demanda que o BNG, recollía no seu Programa de Goberno, considerou que se debe facer un traballo de base para implicar a todo o movemento asociativo. Nun tema tan importante para o conxunto das parroquias, descoñécense os criterios que se van a seguir para a súa dotación, ademais da coordinación co concello.

Existen algunhas outras partidas que chaman a atención en canto á súa plasmación no papel dos orzamentos. Moito traballo para a “galería”, mais non en sectores básicos como as políticas sociais ou de servizos básicos para o concello.

En abastecemento e distribución de auga, xa eliminada no primeiro ano, e así se mantén, as axudas ás comunidades de augas. O subministro de augas en moitas parroquias depende única e exclusivamente destas asociacións, e o apoio do concello debe expresarse en asesoramento e dotación orzamentaria. Senón trátase dunha clara discriminación a respecto de quen ten auga municipal.

Pero igualmente, en canto á extensión do saneamento, somentes se orzamentan 290.000€, que sumados aos 60.000 gastados no exercicio anterior, dan un saldo raquítico coa xestión do goberno de Javier Bas.

Existen outra serie de partidas económicas, que simplemente se limitan a manter unha política de inversións moi “plásticas”, pero que non abordan de vez as problemáticas derivadas pola crise económica.

Neste sentido o Grupo Municipal do BNG mantivo en todo momento unha liña de actuación coherente coa súa estratexia de traballo e o seu xeito de entender a política.