Da man da forza nacionalista, outra volta, os traballadores galegos do mar, volven a ter presenza nos foros de decisión europeos. Deixando en evidencia ás forzas que colleitaron no noso País mellores resultados seguindo intereses alleos, Ana Miranda asumiu a responsabilidade de defender o sector do mar.

Coa intención da Unión Europea de incluír a arte do xeito como unha arte agresiva para o medio mariño, púxose en risco o futuro dun sector moi relevante da pesca galega. Numerosos mariñeiros de Cesantes viron perigar os seus postos de traballo.

Esta situación de crise deixou ben claro quen defende verdadeiramente a Galiza e os seus intereses. A actividade política de Ana Miranda, quen sen seren aínda eurodeputada, representou a mobilización en defensa do mar constituíu un verdadeiro exemplo de compromiso.

O apoio que nas pasadas eleccións europeas recibiu o BNG-EH Bildu, amósase agora como fundamental. Redondela, tamén participou deste apoio á única forza nacionalista galega que se presentou para dar voz a Galiza en Europa. Non podemos máis que fachendear dos pretos de 1.000 votos que respaldaron a Ana Miranda.

O primeiro encontro cun grupo de traballadores do mar no local de Redondela, coa presenza de Ana Miranda, Daniel Rodas e Cecilia Pérez, converteuse nun dos primeiros pasos en firme nesta loita. Despois viñeron concentracións na Lonxa de Cesantes, e noutras de todo o País, as mocións de apoio (a presentada polo BNG e a presentada pola Confraría), ata chegar á viaxe a Bruxelas. Namentres o alcalde Javier Bas, seguía as consignas do seu partido: gardar silencio. Mesmo na sesión plenaria de outubro, na que se debateron as mocións o voceiro popular, Miguel Ballesteros chegou a dicir que si se presentaran alegacións, cuestión que finalmente demostrouse que era mentira.

Agora, unha vez que o xeito chegou a Bruxelas, que o BNG levou a voz dos mariñeiros aos foros nos que se toman cada vez decisións, máis trascendentais para Galiza, dende a Asemblea Local amosamos a nosa completa satisfacción.

Seguirá o BNG traballando polos intereses dos sectores produtivos estratéxicos para o País, pola mellora das condicións de vida dos galegos e galegas, en todos os foros nos que teña representatividade. Tamén no Concello de Redondela.