Prantexamos que  se amplíe a obra outros 200m, xunto a melloras de protección de peóns.

 Publicado o Proxecto de Ampliación da Estrada Provincial EP 2906 ao seu paso pola parroquia de Vilar, o Bloque Nacionalista Galego, considerou necesario incluír unha serie de melloras.

Segundo expresou a voceira nacionalista, Cecilia Pérez, “estamos moi preocupados pola situación na que pode quedar a estrada. Consideramos que a ampliación é moi necesaria, mais pola propia conformación da mesma, podería converterse nun vial moi perigoso”.

“O BNG  apoiou no Pleno a obra, posto que cumpre coas demandas veciñais, para a que o concello aporta 200.000€. Unha vez estudado o Proxecto, observamos que unicamente se van sinalizar tres pasos de peóns. Tendo en conta que practicamente se vai tratar de dúas rectas, por mor da intensidade de vehículos, a reforma da estrada pode traer máis problemas que beneficios”, afirma a nos voceira.

Encontro coa AA.VV. De Vilar.

Nunha xuntanza con membros da AA.VV. De Vilar, o Grupo Municipal do BNG  expresoulles a súa preocupación porque no Proxecto “somentes veñan sinalizados tres pasos de peóns, nun treito dun quilometro e medio, que practicamente son dúas rectas”.   Tampouco queda claro, se se trata de lombos, para reducir a velocidade ou non.

Segundo manifestou Cecilia Pérez“cómpre garantir as máximas condicións de seguridade para os veciños e veciñas da zoa. Unha zoa con varios cruzamentos, con un parque infantil preto da estrada, e varios negocios de hostalaría, Centro Cultural, e mesmo varias empresas nas inmediacións”.

Outra das cuestións que chamou a atención da organización nacionalista, refírese a que  arredor duns cen metros da zoa urbana non van ser urbanizados. “Imos solicitar que estes veciños e veciñas poidan gozar igualmente de beirarrúas, como todos os que viven a carón da EP 2906”.

Consello Parroquial

A voceira nacionalista expuxo a necesidade de debater con todas as asociacións parroquiais este Proxecto no Consello Parroquial. “Antes de que se publicitara o Proxecto da Estrada, o goberno de Javier Bas debería presentarllo ás asociacións e forzas políticas para que se incluíran as aportacións que consieraran, mais non foi así”.

Amosou a súa satisfacción Cecilia Pérez, polo feito de que a única infraestrutura que non se vai cambiar vai ser a de saneamento, posto que a concellería de medio ambiente, no anterior mandato, iniciou as obras, cun investimento duns 270.000€. “Isto ben a demostrar que a presenza do BNG nun goberno municipal, móvese en interese dos veciñ@s planificando e priorizando infraestruturas”.