O Grupo Municipal do BNG de Redondela considera que é unha hipocrisía política por parte do  PP  non considerar como prioritario para as infraestruturas educativas  deste concello  a instalación dun patio cuberto no colexio público de Santa Mariña, una vella demanda de todo o colectivo deste centro.  Na súa visita de onte o xefe provincial de Educación, César Pérez,  dixo que “debido á actual situación económica de crise, a Xunta está a destinar os seus recursos a cuestións estritamente necesarias , e que a dotación do patio cuberto no colexio redondelán non o é".

O BNG de Redondela denuncia que o goberno do  PP si ten  cartos para o ensino concertado, 240 millóns de euros, ou para dar 3 millóns a centros privados que segregan por sexos, a maioría do Opus,  mesmo incumprindo unha sentencia do Tribunal Superior de Galiza que declara ilegais estas subvencións.

Para o BNG o investimento de 120.000 euros para o patio cuberto do colexio publico de Santa Mariña, que protexa da chuvia ós rapaces, si que é unha inversión “imprescindible” porque estamos en Galiza, non en Andalucía, que é onde parece estar o  señor César Pérez.