A iniciativa do BNG, o Pleno de Redondela demanda da Xunta un Plan de Emprego.
O goberno de Javier Bas, defende as medidas tomadas polo executivo galego
Na moción presentada pola organización nacionalista a prol de políticas activas do emprego, solicitábase un cambio de rumbo nas políticas de emprego do goberno de Núñez Feijóo. Fronte aos 8 millóns de euros invertidos no 2013, redúcese a unha partida de tan só 113.000 na presente anualidade. Na defensa da moción, a voceira nacionalista, Cecilia Pérez recordou a necesidade de poñer orzamentos enriba da mesa para diminuír as taxas de paro, que na Galiza superan o 25%. Para isto considera unha condición indispensábel que o goberno da Xunta de Galiza asuma competencias plenas nesta materia.
Incomodidade do goberno municipal.
Non sentou nada ben entre as filas populares a presentación desta moción, esgrimindo que se trata de acordos que pouco ou nada teñen a ver cos verdadeiros problemas dos veciños e veciñas de Redondela. A concelleira de emprego, Ana Alonso, defendeu as iniciativas que en política laboral está a desenvolver a Xunta de Galiza e o goberno do Estado, restando importancia á capacidade do goberno galego de ter competencias plenas.
Para o BNG, o goberno de Javier Bas segue defendendo o emprego en precario. Apostan pola contratación de becarios e becarias como recurso para a entrada no mercado laboral, asinan convenios entre Concello e diversas empresas para prácticas laborais gratuítas aboando os desprazamentos, fomentan as contratacións municipais por pouco máis de 500 euros, e mesmo xustifican a temporalidade laboral.
Trátase de afianzar un modelo baseado na precariedade, na temporalidade e na perda de dereitos laborais, que o Partido Popular pretende instaurar tanto na administración pública, como na contratación de carácter privado.
Xustificación da abstención.
Cecilia Pérez rebateu todos e cada un dos argumentos da concelleira popular. Avogou porque o goberno da Xunta dote orzamentariamente partidas e políticas activas a prol do emprego.
Novamente o goberno municipal de Redondela, rexeitando frontalmente tanto os contidos, como os acordos recollidos nunha moción plenaria, decide absterse para evitar o conflito cos sectores que están sendo agredidos polas políticas antisociais do Partido Popular. A moción presentada pola forza nacionalista, saíu adiante grazas aos apoios de AER e PSOE.
O BNG vai continuar traballando a prol dos sectores produtivos, e das capas sociais que están soportando unha crise imposta por un sistema que fomenta as desigualdades, no que o Partido Popular exerce un enorme protagonismo