“O goberno de Javier Bas convida aos actos festivos, á persoa responsábel da ampliación da AP-9”.

A organización nacionalista cuestiona a presenza da ministra de Fomento o día 11, sen ningún sentido nin lóxica, salvo por cuestións meramente “electoralistas”. Para Xoán Carlos González, concelleiro nacionalista, a cuestión ten o seu simbolismo, posto que se trata da persoa responsable  da ampliación da Ponte de Rande, e da AP-9 ao seu paso por Chapela”.

Recordan dende as filas nacionalistas, que esta ampliación vai supoñer a defenestración de Chapela. Aumentan o número de carrís de circulación, aumentan as afeccións sobre a parroquia, e diminúe a calidade de vida de veciños e veciñas.

Consideran dende a organización nacionalista, toda unha provocación a presenza de Ana Pastor en Redondela. “En todo caso, tería que ter vido a dar explicacións sobre os motivos do seu departamento para promocionar unha ampliación inútil a todas luces, de enorme impacto ambiental, e cunha importante resposta social en Chapela”.

Complicidade do goberno de Javier Bas.

“Queda ben claro que todas aquelas iniciativas que tomara o alcalde, aparentemente en contra da ampliación, simplemente eran un paripé para quitarse de enriba a presión veciñal”, engade na súa nota o Grupo Municipal do BNG.

Unha vez máis exixen a paralización inmediata do Proxecto de Ampliación, posto que non vai solucionar o problema da mobilidade na Área de Vigo, “máxime cando está a diminuír o tráfico rodado que utiliza a autoestrada”.

Para o BNG a única solución pasa por fomentar o transporte público, como o tren de cercanías, transporte no que o ministerio de Fomento ten moito que dicir.