Ínstase ao goberno galego a tomar a iniciativa para realizar un estudio o máis completo posíbel sobre a calidade das augas e fondos mariños. Realizar unha correcta diagnose para poñer en práctica iniciativas que garantan o futuro da Enseada.

A consideración deste espazo de interese comunitario non significa que se vaia a conservar. Todo o contrario, paseniñamente foise degradando nas últimas décadas, e a acción de entes dependentes da Xunta e do Estado agravan esta situación.

Aterros, verquidos, desaugues incontrolados da Presa de Eiras, falla no mantemento e conservación, presenza constante de embarcacións contaminantes. Da Enseada viven centos de persoas que se adican á actividade extractiva, como o marisqueo e pesca artesán para productos como o choco. A Enseada recuperada medioambiental e culturalmente pode ser un dos recursos de creación de riqueza no futuro inmediato.

Para acadar este obxectivo estamos a traballar dende o Bloque Nacionalista Galego, comprometendo a diferentes administracións para que se preocupen moito máis pola Enseada San Simón.