O BNG afirma que o transporte de bacharelato en Redondela está garantido
Xoán Carlos González, “acordamos co goberno de Digna Rivas costear este servizo co IBI da Autoestrada”.
Ante as informacións verquidas en diversos medios sobre o risco de que 80 alumnos e alumnas de bacherelato de Redondela queden sen transporte escolar, dende o Bloque Nacionalista Galego queremos transmitir ás familias unha mensaxe de tranquilidade.
Negociouse hai varios meses cunha proposta que a organización nacionalista considerou realizable e positiva. O alumnado das parroquias de Redondela que cursan bacharelato, teñen garantido o transporte.
Segundo o voceiro do BNG, Xoán Carlos González, “acordamos co goberno de Digna Rivas que se investisen os 140.000€ que o concello recadará polo IBI da Autoestrada, para solucionar o problema do transporte do bacharelato”. Deste xeito dábase cunha solución “temporal”, posto que se trata dun servizo que compete á Xunta.
Segundo anunciou, “xa se realizaron varios encontros cos autónomos do taxi, cunha boa disposición a chegar a acordo”. Disporíase do número de taxis necesarios para cubrir o servizo e que os 80 mozos e mozas puideran asistir ás clases de bacharelato sen maiores problemas. Quedaban pequenos axustes como o número final de usuarios e usuarias, e as liñas do transporte.
Os cálculos que manexan dende a organización nacionalista ronda os 60.000€ ano sendo necesarios uns vinte taxis. “Ante o desinterese da Xunta polo ensino público en Redondela, o BNG atopou unha solución”, insistíu. Non renunciamos a seguir presentando iniciativas para que o goberno galego subvencione o transporte de bacharelato, “e non sexan os concellos quen paguen servizos que non lle corresponden”, afirma González.
Destaca a actitude dialongante e construtiva do BNG “ frente a quen nos acusa de querer boicotear ao goberno de Redondela”, sinala o voceiro nacionalista. Sorpréndenos a polémica “estéril” creada nestes días “pois este é un tema que xa se repite todos os anos”.
Máis novas
