Convida aos e as redondeláns a participar na manifestación do 1º de maio dende A Doblada.

Como todos os anos a Asemblea Local do BNG de Redondela, vai participar en masa na manifestación do 1º de maio convocada pola Confederación Intersindical Galega. A mobilización sairá dende A Doblada ás 11.30 da mañá.

A organización nacionalista participará nas mobilizacións convocadas pola Confederación Intersindical Galega en toda Galiza, baixo o lema “Contra a explotación e a pobreza”. Para o responsábel local de Redondela, Xavier Balsas, “atopámonos nunha situación de emerxencia social, cunha dereita económica e política que pretende asfixiar á clase traballadora”.

A dereita, encabezada polos poderes económicos, de carácter especulativo, e polo Partido Popular, iniciou unha senda de perda de dereitos laborais e sociais das clases máis desfavorecidas, afirma Balsas.  “Mantéñense os índices de paro; a xente nova vese na necesidade de emigrar; as condicións laborais son cada vez máis precarias; privatización de servizos sociais básicos; e un longo sen fin”. destaca o responsábel local.

Contra estas políticas neoliberais, instauradas polos oligopolios económicos, transmitidos pola Troika e o Banco Central Europeo, personificadas en Ángela Merkel, Mariano Rajoy e Núñez Feijóo, unha forza nacionalista e de esquerdas como o BNG, enfróntase a esta estratexia. “Cómpre unha resposta masiva e continuada dos traballadores e traballadoras, contra estas políticas da Unión Europea e dos gobernos do Partido Popular. Debemos participar nas manifestacións do 1º de maio, non xa para pedir dereitos, senón para que non se deteriore aínda máis a situación deste País”, afirma.

O goberno de Javier Bas, paradigma desta involución.

Xavier Balsas amosa a súa convicción de que “o goberno de Javier Bas aplica todas e cada unha das directrices emanadas polos gobernos do PP por convicción ideolóxica, non por imperativo como pretenden facer crer”.

Constátase nos últimos meses como Redondela tamén “comparte” a mesma situación que o resto do País. Neste escenario, o goberno de Bas pretende sacar tallada. “Oferta unha situación de precariedade para presentar cursos de formación que carecen de calquera tipo de estudio de saída; desconfían dos traballadores/as do concello; priman ás empresas privadas.”

Para o responsábel local do BNG o capítulo máis grave tense sucedido nas últimas semanas, en relación á contratación de persoal do concello. “Primeiro negocian coa Deputación para que por medio dunha subvención se contrate a un grupo de persoas, con disposición absoluta, por un soldo de 532€ brutos. Despois sacan a concurso, unhas prazas en condicións similares que van percibir algo máis dos 700”. Por vez primeira o goberno municipal de Redondela, contrata en condicións inferiores ao mercado laboral.

Recorda a necesidade de “non quedarse cos brazos cruzados e resignarse pois son dos recursos que emprega a dereita para impoñer a súa estratexia”. Para Xavier Balsas, responsábel local do BNG de Redondela, cómpre unha demostración de forza para deter as intencións da dereita económica e política.