Acusamos a Javier Bas de querer converter Redondela en patrimonio de Louzán.

A publicación no Boletín Oficial da Provincia, dunha nova partida de 650.000 € para a construción dunha novas bancadas no campo municipal de Santa Mariña, espertou preocupación no Bloque Nacionalista Galego.  Para a nosa organización “trátase dun claro exemplo de electoralismo do goberno municipal de Javier Bas”.

Esta segunda inversión súmase aos máis de 500.000€ empregados na renovación de dous terreos de xogo, nesta mesma zona. Para o Bloque Nacionalista Galego, o que pretende o alcalde “é centralizar e saturar un espazo como o de Santa Mariña, con claros tintes electoralistas pois  xa o ten manifestado en diversas ocasións: "as maiores inversións vanse realizar onde se concentre máis xente”.

Feudo da Deputación

Para o BNG o Partido Popular quere converter Redondela nun feudo de Rafael Louzán, actuando sen ningún tipo de planificación. A racionalización da inversión pública debe vir abalada segundo as demandas e necesidades efectivas de todo o concello, senón convértese nun novo exemplo de derroche dos cartos públicos, dos que o goberno de Javier Bas ten feito gala nestes meses

“Unha maneira de proceder totalmente propagandística”, é a valoración que desta nova inversión de 650.000  da Deputación nunha única infraestrutura deportiva municipal, fai a nosa organización. Lembramos dende o BNG, a necesidade da mellora doutras instalacións deportivas no concello de Redondela, “ás que se está deixando de lado”.

Dende a organización non cuestionamos a necesidade de que o terreo de xogo e outras dependencias anexas deste campo municipal de Santa Mariña, tiveran que ser renovados. Pero os preto de 1.200.000€ que finalmente se investirán, sufragarían a mellora  doutras instalacións similares que o Concello por medio de convenios, podería chegar a xestionar, como nos casos do campo de fútbol de O Viso e Vilar.

Finalmente recordar que o BNG aposta por unha descentralización e racionalización da inversión en infraestruturas deportivas municipais. Defenden un modelo de actividade física e deportiva como complemento da formativa, e na que teñan cabida os denominados “deportes minoritarios”.