Pola súa banda o voceiro nacionalista Xoán Carlos González cargou contra a actitude dos grupos que votaron en contra que xa dende maio manexaban o documento sen facer aportacións. “Están paralizando un texto necesario para que moitos veciños e veciñas reciban axudas económicas municipais, escudándose en informes técnicos”. “O PP como grupo maioritario mantén bloqueada a ordenanza baixo directrices de Javier Bas”, sinalou. En canto a actitude de AER e PSOE referíuse a que “escenificaron moi boas relacións en diversos acordos, mantendo dende hai meses conxelado o da aprobación de Emerxencia Social”.

Recordou a importancia de sacar adiante a modificación da actual Ordenanza. “Contemplanse axudas económicas para aquelas familias que están a sufrir os envites da crise económica”. Cun orzamento de 80.000€, pódese solicitar a colaboración do concello para evitar desafiuzamentos, axudas para aluguer ou bens de primeira necesidade como alimentos, vestidos, recibos de enerxía eléctrica, melloras na habitabilidade das vivendas.

Afirmou o edil do BNG que a ordenanza rexeitada podería facilitar que moitas familias aumenten a contía das axudas, dun xeito máis axil por parte do concello. “Medra o nível de ingresos das familias que se poden acoller a estas aportacións económicas. Tamén aumenta a contía das axudas que poden recibir as familias, “mesmo triplicando o que actualmente reciben”, enfatiza. Valora como positivo que os informes sociais, teñan máis repercusión e que se reduzan os prazos das concesións de urxencia.

Empraza Xoán Carlos González á alcaldesa Digna Rivas, a poñer maior empeño en acadar os apoios necesarios para sacar adiante o texto. Insiste o edil nacionalista en manter o voto afirmativo do BNG “porque queremos ser útiles aos veciños e veciñas de Redondela. Mantemos o noso compromiso de actuar con responsabilidade tendo en conta os dereitos de colectivos e familias que están a sufrir a grave crise económica”.