Neste sentido o voceiro do BNG, Xoán Carlos González demanda ao goberno de Digna Rivas unhas podas o máis axustadas ás necesidades de mantemento do arborado, conxugadas coas necesidades dos nosos vecinos e veciñas. Demandamos que se teña en conta que durante o periodo estival as altas temperaturas e a radiación solar provoca que en moitas ocasións os espazos de sombra sexan prioritarios para permitir que a Alameda sexa un entorno de lecer.

Considera debe manterse un necesario equilibrio entre unha intervención de conservación das árbores da Alameda, e ter en conta as altas temperaturas da primavera e verán. Recolle neste sentido as queixas “lóxicas” de moitos país e nais sobre a situación do parque infantil Xohana Torres. As agresivas podas provocan que nos meses de primavera e verán, nas hora de maior incidencia solar, expúlsase aos cativos e cativas do parque infantil ao non existir ningún punto de sombra, denuncia.

A Alameda Castelao constitúe un dos entornos máis singulares do casco urbano de Redondela. Sobre unha superficie aproximada duns dez mil metros cadrados, medran plátanos, arces, magnolios, datileros... e elementos singulares como a estatua de Castelao, Xan Carallás, o Palco da Música o cruceiro... A sua orixe data de inicios do século XX, cando se iniciou a canalización do Río Alvedosa.