Proponse a construción de beiravías na N-550 dende o núcleo urbano ata o crucamento coa estrada provincial.

Por iniciativa da Asemblea Local de Redondela, a deputada do BNG Olaia Fernández Davila presentou unha emenda aos orzamentos xerais do estado para o ano 2015, que afecta á zona de Cesantes. “En concreto refírese ao treito da N-550 que vai dende o núcleo urbano ata o cruzamento coa estrada provincial 2901”, anunciou o noso responsábel local Xavier Balsas.

Para o BNG trátase dun treito “moi transitado por veciños e veciñas de Cesantes, que á vez soporta un elevado movemento de vehículos diariamente, polo que se debe preservar a súa seguridade coa construción de beiravías”.

Segundo o responsábel local  a presentación desta iniciativa está sobradamente xustificada. “Nesta zona atópanse situados o Centro Cultural da parroquia e o Colexio Público, ademais dun importante número de vivendas”, sinala, “polo que o movemento de persoas alcanza importantes cotas”.

Deste xeito “acadaríase un elevado grado de seguridade viaria neste espazo, posto que reducir o movemento de vehículos constitúe unha difícil tarefa, e para nós é prioritaria a mellora da seguridade viaria. Se non poñemos enriba da mesa esta situación, demandando a inversión de Fomento, o ministerio non vai a actuar”, conclúe o noso responsábel local.