Víuse forzado o equipo de goberno a levar esta proposta a Pleno, despois de que o contrato que agora caduca fora aprobado hai ano e medio por xunta de goberno. Os resultados; nefastos para os usuarios e usuarias e as súas familias.

Recóllese unha partida de 4’8 millóns de euros para os tres anos de contrato, “no que se mellora o prezo de partida por hora e se reserva preto de 260.000€ para eventualidades, como esperamos sexa as melloras salariais das traballadoras”, salientou o voceiro do BNG, Xoán Carlos González Campo. Preto de 120 familias vense beneficiadas pola prestación dun “servizo social básico do que viven unhas 50 traballadoras”, engadíu.

Denunciou o edil nacionalista que malia tratarse “dunha obriga da Xunta de Galiza, soamente aporta 12€/h., cando o prezo de saída da licitación ronda os 23’2€”. Isto supón que o concello de Redondela debe aportar 600.000€ anuais para pagar a atención de calidade aos usuarios e usuarias.

Lamentou na súa intervención Xoán Carlos González Campo, que o goberno municipal rexeitara negociar a remunicipalización dun servizo como a piscina que daría beneficios ás arcas municipais, para colaborar no financiamento do SAF. O voceiro nacionalista, valorouno como unha oportunidade perdida polo bipartito.