Xoán Carlos González, considera ilegal os aterramentos a carón do cemiterio de Mañó.

“Este goberno municipal amosa unha incapacidade manifesta na erradicación e eliminación de restos de obras e refugallos”, considera o concelleiro nacionalista. En ningún momento pretendeu unha solución que reducira o impacto ambiental destes restos.

Responsabilizamos directamente ao alcalde de Redondela, Javier Bas, e aos concelleiros de Obras e Medio Ambiente, pola situación creada.

Céntrase ao longo da súas críticas no aterro dunha parcela propiedade municipal, sita a carón do cemiterio de Mañó. Unha superficie, duns 3.000 metros cadrados, feitos en noiros e socalcos que superan os cinco metros de altura.  “Paseniñamente foise aterrando esta parcela, con terra procedente de actuacións municipais. Mais o máis alarmante é que  parte do material empregado debería ser tratado en centros especializados”. Afirmamos que refugallos, baldosas, asfalto, ladrillos e bloques, tubarias, e plásticos, … forman parte do material que se verqueu neste espazo, tapándoo a medida que se botaba.

Sinala o concelleiro nacionalista, que en contra do sentido común, e da normativa medioambiental tanto da Xunta como do propio concello, dende o goberno de Javier Bas empregaron este espazo da parroquia de Quintela para botar todo o seu lixo.

Consideramos igualmente gravísimo que “o propio concello, a propia administración local, careza dun Proxecto para levar a cabo este aterro. No canto de exercer de modelo cos veciños e veciñas, cumprindo a normativa, limítase a actuar ilegalmente”,

“Cóllase por onde se colla, esta intervención amosa unha clara vontade do goberno municipal, de “promover” intervencións ilegais. Evidénciase que deixar que o Partido Popular se encargue da xestións dos residuos, constitúe unha temeridade dende o punto de vista medioambiental”