O deputado lembra as iniciativas rexistradas na cámara baixa para defender os intereses da veciñanza de Redondela. Por un lado os compromisos acadados para a rebaixa das peaxes na AP-9 e a liberación das portaxes no tramo Vigo-Redondela. “Agora o Goberno do Estado segue sen aclarar como vai levar adiante esta gratuidade, nos seguires reclamando que cumpran co acordado, e que retiren as peaxes, non podemos pasar por unha solución que obrigue aos veciños e veciñas a utilizar aparellos de telepeaxe para o pagamento” reivindica Rego.

            Así mesmo, seguirá a exixir ao Ministerio a retirada do proxecto de construción de muros de formigón como medio para reducir a contaminación acústica que sofren as veciñas e veciños polo paso da autoestrada nas zonas máis habitadas. “Débense instalar pantallas acústicas que sexan lixeiras visualmente, que se integren no entorno, non poden servir para dividir aínda máis o barrio” subliña o deputado.

            Rego mantivo un breve encontro con representantes dos veciños e veciñas afectadas pola situación da factoría Aucosa, en Cabanas-Trasmañó. No seu momento, presentou varias iniciativas no Congreso dos Deputados instando a que o Ministerio de Transición Ecolóxica se posicionase sobre a ubicación desta empresa responsábel de fedores, e verquidos na Ría.

            No encontro mantido na Alameda Castelao de Redondela, o deputado nacionalista dirixiuse ao corpo militante, veciños e veciñas, e membros de colectivos  poñendo en valor as mobilizacións polo Día da Patria Galega, que o vinte cinco de xullo, terá o seu colofón na Manifestación polas rúas de Compostela.