Vivíronse momentos de tensión ao tildar dende o Partido Popular de “panfleto” a Iniciativa Lexislativa Popular base do texto da moción que reclama melloras neste chanzo da atención sanitaria. Mofáronse da exitosa manifestación celebrada en setembro, cun amplo respaldo popular. Chegouse a afirmar dende o PP, que se trataba dunha moción electoralista.

Argumentou o voceiro nacionalista, Xoán Carlos González, que os e as populares dábanlle as costas aos seus e as súas propias votantes, “sufridores tamén da situación de deterioro no que se atopa a sanidade galega”. Botoulles en cara que se mofaran da manifestación, rexeitado as acusacións da motivación electoralista da moción “ao tratarse xa da terceira moción da mesma temática debatida dende o ano 2019”.

A moción poñia o acento no papel que os concellos teñen na recuperación da Atención Primaria, demandando nos Plenos que a Xunta de Rueda aumente as inversións na sanidade pública galega. Tal como recollía o texto da moción Xoán Carlos González reclamou “unha atención primaria preventiva, na que se traballe coordinadamente e na que ademáis de mellorar a ratio dos médicos de familia, e pediatras, cómpre ter en conta a saúde mental”.