A construción dun Centro Comercial no Canabal, suporía a defenestración do comercio local.

Máis de dúas horas sobraron no Pleno no que se debateu a modificación das normas subsidiarias do Canabal para a construción dun centro comercial. Máis de dúas sobraron para coñecer que o goberno de Javier Bas dera marcha atrás nun Proxecto, que, con todo, seguen a defender.

A voceira do BNG foi tallante na súa exposición; “darlle saída a este Proxecto suporía a   desaparición para o comercio de proximidade”. Un comercio que goza dunha longa tradición en Redondela, que coñece perfectamente ao cliente a quen se dirixe, que crea postos de traballo, e que pode superar a crise.

Calquera tipo de respaldo á modificación das normas urbanísticas simplemente “serviría para beneficiar a uns poucos en detrimento de moitos”, continuou na súa exposición a voceira nacionalista.

Nas intervencións de Arturo González, quedou claro que o goberno municipal aposta polo desenvolvemento deste Proxecto (por certo nin referencia del no seu Programa Electoral). Á espera de “tempos mellores” decidiron rexeitar a modificación urbanística.

Mais non foi a presión das forzas da oposición a que fixo que o goberno de Javier Bas, dera marcha atrás. Foi a concienciación dos propios comerciantes da Vila a que fixo tremer ao goberno municipal. Vendo esta actuación como unha agresión directa ao seus intereses e ao seu futuro como sector de relevancia en Redondela, saíron publicamente a deter este Proxecto.

O alcalde, Javier Bas, agochouse unha vez máis. Dando mostras de que non ten capacidade, nin é valente cando as cousas non saen ben, utilizou ao concelleiro de urbanismo e ao parlamentario, Alberto Pazos, para defender o Proxecto.

O primeiro, porque comparte o Proxecto punto por punto. Nalgún momento da exposición parecía máis o xestor do complexo, que un concelleiro municipal. O segundo, porque non quere deixar de ter protagonismo, para tamén ver se veñen “tempos mellores”.

O que queda claro para o BNG de todo este proceso é que o PP vai seguir apostando polo centro comercial e que a presión social vai ser decisiva para que isto non saia adiante.