Bloque Nacionalista Galego de Redondela

Por segunda ocasión en menos dunha semana, parte de Chapela viuse afectada por unha avaría no alumeado público. En concreto trátase da avenida de Vigo, unha das principais vías de comunicación da parroquia.

Tal como vén sendo costume, aproximadamente unha vez ao mes, prodúcese unha avaría nesta infraestrutura. Diversas zoas e parroquias do concello de Redondela, teñen sufrido a mesma situación, xa denunciada dende o BNG.

“Nesta ocasión, a cuestión complícase. Estamos a falar do segundo corte de alumeado nunha semana, en Chapela, nunha zoa de intenso tráfico rodado. Ademais, nesta época do ano na que as horas de luz natural redúcense a mínimos anuais, cómpre que a xente que camiña pola rúa, o faga con todas as garantías”, recorda Xoán Carlos González, concelleiro do BNG.

Por medio do seu concelleiro, a organización nacionalista ten presentado numerosos escritos dirixidos ao alcalde de Redondela, para que se dean as preceptivas explicacións. Ata agora, ningunha resposta, ningún comentario,... “Supoñemos que se trata dunha situación de gravidade, que pretenden silenciar. Unha mostra máis da incapacidade na xestión do goberno do PP”, afirma.

Responsabilizan  ao alcalde de Redondela, da falla de  resolución dunha problemática, que afecta  directamente á seguridade viaria tanto de peóns como de condutores. “Semella que isto non é un problema para o goberno de Javier Bas, polo que ignoran os requirimentos do BNG. Esiximos de inmediato a resolución das avarías no alumeado público de Redondela, en aras da seguridade viaria de condutores e peóns”

“O Consorcio de Servizos Socias vai cobrar anualmente 2.500€ por usuari@ redondelán”.O silencio de Javier Bas, tras cinco anos agardando pola posta en marcha desta infraestrutura,  obedece unicamente a intereses partidistas

A inminente sinatura do convenio de colaboración entre o Concello de Redondela e o Consorcio Galego de Servizos de Igualdade e Benestar, para a posta en marcha do Centro de Día de Cesantes, constitúe unha proposta “humillante”, segundo o concelleiro do BNG.

“No propio convenio o Concello está obrigado a aboar anualmente 2.500€ por cada usuari@ empadroado en Redondela. A proposta ao obrigar a facelo durante os vindeiros 10 anos, aumentando a cantidade co IPC. Segundo o número de usuari@s aos que se lles vai prestar servizo, 40, o Consorcio podería cargar ata 100.000€ anuais ás arcas do Concello”. Segundo o concelleiro nacionalista, “para ser un servizo que, segundo o goberno municipal non é demandado pola veciñanza, vainos saír moi caro a todos os e as redondeláns”.

Para Xoán Carlos González, a Consellaría de Servizos Sociais, de quen depende o Consorcio, debe prestar este servizo de carácter social aos nosos veciños e veciñas de máis 65 anos de Redondela e bisbarra. “Agardaron a que pasaran as eleccións galegas para presentar este convenio. Entendemos agora que se dilatara a posta en marcha do Centro de Día de Cesantes, cinco anos. A Xunta agardaba a aprobación de convenios como este que volven a cargar grande parte do mantemento, sobre os concellos, como neste caso de Redondela”, afirma.

Sinala o concelleiro nacionalista ao silencio cómplice do alcalde, Javier Bas, quen actuou en todo momento seguindo as directrices do Partido Popular, “nunca defendeu  aos veciños e veciñas de Redondela rebelándose contra o Consorcio”. Malia que houbo diversas mobilizacións sociais, e iniciativas no Parlamento Galego, o silencio sempre foi a resposta.

“Redondela puxo os terreos para a construción do edificio. Cumpriu a súa parte da responsabilidade. Agora preténdesenos cobrar 2.500 euros, por estar empadroado no noso concello. Descoñecemos que pasará coas restantes vinte prazas residencias, para as que o Centro de Día foi construído, cunha inversión de dous millóns de euros, e polo que levamos agardando case cinco anos”, recorda o concelleiro do BNG.

Finalmente, Xoán Carlos González considera que “se o resultado de agardar cinco anos, tradúcese neste convenio do Centro de Dia de Cesantes tan lesivo para os intereses do Concello de Redondela, o mellor é que Javier Bas se vaia para casa”.

En declaracións do concelleiro nacionalista, Xoán Carlos González “malia que tardara máis dun ano en solicitar un encontro co deputado de vías e obras, valoramos positivamente a xuntanza da semana pasada”

O encontro mantido entre distintos membros do goberno municipal de redondela, encabezada polo alcalde Javier Bas, e o deputado de vías e obras, o nacionalista, Uxío Benítez, foi acollida con satisfacción dende o BNG de Redondela. “Trátase da maneira axeitada de traballar a prol dos intereses dos veciños e veciñas”, afirma Xoán Carlos González.

Malia todo recrimínalle ao alcalde redondelá, “que tarda máis dun ano en solicitar dito encontro, sendo un dos últimos rexedores que o demandou”. Recorda como o goberno municipal de Redondela, presentou durante meses “numerosas mocións que pretendían dilapidar calquera tipo de iniciativa prantexada dende a Deputación, especialmente na área de vías e obras”. Considera que ao alcalde de Redondela, “unicamente actuou en aras de intereses partidistas, e nunca dos intereses dos e das redondelás”.

Amósase satisfeito o concelleiro do BNG, de que dende a Deputación se respostara á “solicitude deste encontro, dando un claro exemplo do cambio radical que se imprimiu na institución provincial abandonando o sectarismo e desquite ao que nos tiña acostumado o PP”.

Igualmente, o concelleiro nacionalista, considera moi positiva a petición de rematar as obras da PO 2906, Guizán-Os Valos, tal como tiña solicitado anteriormente a propia AA.VV. De Vilar, nun encontro mantido co propio Uxío Benítez. “Recordamos que coa Deputación presidida por Louzán, orzamentouse un millón de euros para rematar a obra. Namentres se desviaron parte dos fondos, e quedou inconclusa, o alcalde de Redondela mirou para outro lado”, afirma o concelleiro nacionalista.

Considera moi positivo o cambio de actitude do alcalde de Redondela, Javier Bas, para poñer os intereses dos veciños e veciñas por riba dos intereses partidistas. Aposta por un diálogo permanente coa Deputación, defendendo cada quen as súas competencias mais tamén o debido respecto institucional. Finalmente recorda Xoán Carlos González, “que o BNG aposta por baleirar de competencias a Deputación, mais o primeiro é superar a política clientelar imposta no pasado por Rafael Louzán”.

Refírese en concreto á recuperación do río Alvedosa en Reboreda, que non se levou a este órgano participativo.

Nas últimas semanas estanse celebrando diversos consellos parroquiais, tal como marca a normativa das convocatorias trimestrais. Para o concelleiro, “evidénciase novamente a falla de interese nestes órganos co fin de que se debatan diferentes actuacións de calado nas parroquias”

Refírese en concreto o concelleiro nacionalista á ocultación dun Proxecto de recuperación das marxes do río Alvedosa na parroquia de Reboreda. “O máis lóxico tería sido que se presentara no Consello Parroquial, para que os diferentes colectivos valoraran a actuación, manifestando a súa opinión”, apunta. O concelleiro do BNG refírese á construción dunha senda peonil, cunha inversión de 60.000 euros, e uns 200 metros de lonxitude. Inclúese a construción de muro na beira do río, pechamento con vallas, pavimento con lousa de granito, varandas de aceiro inoxidábel, e mesmo unha rampa para accesibilidade de persoas con mobilidade reducida.

“Tras a negativa xestión da senda polo río Maceiras, no que a obra se realizou sobre o mesmo río, empregando incluso refugallos, temémonos o peor. Pretender que o goberno de Redondela, leve a cabo unha actuación que supostamente será de recuperación medioambiental, segue sendo unha temeridade”, considera o concelleiro do BNG.

Para Xoán Carlos González, tal como ten sucedido noutras ocasións, “o goberno de Javier Bas pontea aos órganos participativos, para presentar proxectos estrela, cun único afán propagandístico”.

A intención da organización nacionalista, busca que o Pleno da Corporación apoie aos veciñ@s afectados pola ampliación da Autoestrada en Cabanas, para que lle expropien a aqueles que  o demanden. Tamén se pretende forzar á construtora para que instale pantallas acústicas, mitigando os ruídos sobre as vivendas do barrio.

Na mañá do venres 14, o concelleiro do BNG, Xoán Carlos González, entregaba por rexistro a solicitude de celebración dun Pleno Extraordinario da Corporación. O obxectivo principal, é o debate e o manexo por parte dos e das representantes municipais de toda a información sobre a nova problemática creada coas obras en Rande. “Empregar maquinaria pesada, con guindastres que pasan sobre as cabeza dos veciños e veciñas, cunha obra que vai marcar de vez o seu futuro, e por mor do evidente impacto que para a zoa vai ter, pedimos a convocatoria deste Pleno”.

Segundo considera o concelleiro nacionalista, “os directamente afectad@s teñen dereito a que Redondela lles apoie e respalde. Teñen dereito a que se expropien unhas vivendas que van quedar practicamente debaixo da Ponte. Nós, os e as representantes políticos estamos para isto”.

A situación de varias familias da zoa de Cabanas, pode converterse nas de maior impacto da “innecesaria” ampliación. Critican dende o BNG, que, ata o momento, ningunha forza teña levado ao Congreso, iniciativa algunha para presionara a AUDASA. “É máis, namentres estase estudando o rescate da concesión das autoestradas en Madrid, a que verdadeiramente debería ser xestionada polo goberno galego, non hai quen o defenda”, aclara o concelleiro nacionalista.

“Agora a pelota está sobre o tellado da alcaldía, quen pode convocar este Pleno Extraordinario. Agardamos que Javier Bas, cumpra o seu cometido, e nos permita debater e apoiar aos veciños e veciñas”, remata na súa nota o concelleiro nacionalista.

O concelleiro nacionalista, Xoán Carlos González, participa na concentración diante do Concello, xunto aos colectivos convocantes.

Na mañá do domingo, asociacións que traballan a prol do uso da bicicleta como medio de transporte nas cidades e vilas da nosa área, levaron a cabo unha marcha dende Pontevedra a Vigo. A iniciativa contou con diversas paradas de carácter simbólico, para chamar a atención da cidadanía, e de poderes locais, para o fomento e uso da bicicleta.

Xoán Carlos González, animou a membros da Asociación A Golpe de Pedal, Asociación Pedaladas, a manter a súa liña de traballo e concienciación. Manifestou o apoio da organización local do BNG, das reivindicacións polos espazos urbanos máis humanizados onde a bicicleta lle gañe espazo ao vehículo particular, ofrecéndose a manter encontros no futuro con ditas asociacións. A mobilización contou co apoio da AA.VV de Chapela.

Informoulles aos alí concentrados, como por iniciativa do BNG, Redondela converteuse nun dos concellos pioneiros no fomento do uso da bicicleta, a traveso do servizo de alugueiro. Unha das primeiras medidas tomadas polo goberno de Javier Bas foi a de eliminar dito servizo.

Ao remate da concentración Xoán Carlos González afirmou que “por vez primeira o goberno municipal de Javier Bas é congruente cos seus principios. No seu momento eliminou o sistema de alugueiro de bicicletas. Agora non participa deste tipo de actos que apostan por unha mobilidade sostíbel,”.

Xoán Carlos González Campo, con D.I. , veciño de Redondela, e con enderezo, a efectos de notificación en Praza da Constitución,1 C.P. 36800

EXPOÑO: Con motivo da realización da derradeira fase das obras de diversas infraestructuras deportivas a carón do Paseo do río Pexegueiro, a empresa responsábel de construír as Pistas de Pádel, botou restos de refugallo, cascallos de obra a carón das pistas de tenis. Dado que este espazo de esparcemento e lecer, mais tamén de recuperación dos últimos restos da Marisma de Redondela, ademáis de tratarse de material que debe ser tratado mediante os mecanismos e procedementos axeitados.

SOLICITO que o alcalde de Redondela exixa á empresa constructora das pistas de pádel, para que retire este vertedoiro ilegal no Paseo do Pexegueiro, procedendo ao tratamento axeitado do refugallo alí verquido.

Asdo.  Xoán Carlos González

Redondela, 12 de setembro de 2016

Resposta do Concello de Redondela:

Expediente nº: 4661/2016 Destinatario: Grupo municipal do BNG Procedimiento: SOLICITUDES DE INFORMACIÓN GRUPOS MUNICIPAIS En relación coa súa solicitude de data 13768 de data 13/09/2016 segundo a que “solicita que o alcalde de Redondela esixa á empresa construtora das pistas de pádel que retire este vertedoiro ilegal no Paseo do Peixegueiro, procedendo ao tratamento axeitado do refugallo alí vertido” Informado este departamento pola Secretaría xeral do Concello de que as referidas obras están sendo realizadas pola Deputación provincial de Pontevedra, no marco das obrigas contraídas coa sinatura o 28/11/2014 do Convenio para o proxecto “Fase III do Complexo Polideportivo Santa Mariña. Redondela”, rexistrado co número 164 (expte. 838/2016 de Gestiona) que na súa base Terceira di: “A Deputación provincial de Pontevedra procederá polo medio de contratación mais adecuado o encargo que comprende as obras relativas á instalación de pistas de pádel abertas, vestiarios, instalacións complementarias e zona de aparcamento do complexo deportivo Sta. Mariña.” En data 16/09/2016 este departamento contacta co director da obra, que realiza unha vista de control o día 19/09/2016 a partir da que se adoptan as medidas precisas para a total limpeza da zona e o procedente tratamento residual do vertido. (documento datado e asinado electronicamente na marxe) 

A proposta común de todos os grupos da oposición de baixada da plusvalía, aprobada polo Pleno da Corporación de Redondela, foi valorada positivamente dende a organización nacionalista. O concelleiro, Xoán Carlos González, considera que “dáse resposta a unha demanda social, posto que o noso concello atopábase entre os máis elevados, no abono da plusvalía”.

Aplicando este imposto municipal, as arcas do Concello recibían máis de 500.000 euros anuais. “Deste xeito, o goberno de Javier Bas podía fachendear dunha boa xestión, grazas a uns ingresos desorbitados cargándoos sobre os veciños e veciñas”, apunta.

“Coa proposta aprobada cos votos a favor de PSOE, AER, BNG e concelleira non adscrita, e os votos en contra do PP, rebáixase á metade o tipo coa que se gravaba a compravenda de vivendas e fincas urbanizables” salienta o concelleiro nacionalista.

Destaca igualmente Xoán Carlos González o feito de que se aprobara a bonificación do 95% nas doazóns, entre as que se atopan as herdanzas. “Tratábase dun dos casos máis graves, por afrontar moitas persoas desembolsos de miles de euros, convertendo estas transmisións nunha lousa económica, máis que nun beneficio”. Coa aprobación da modificación da plusvalía  vaise aliviar a carga impositiva respostando a unha demanda social, máxime tendo en conta a complexa situación económica pola que atravesan moitas familias.

Critica á súa vez á concelleira de urbanismo, Mari Carmen Amoedo, por pretender confundir á veciñanza. “Quen realmente fixo barra libre, foi o goberno do Partido Popular, ao eliminar o imposto de transmisións patrimoniais no caso das transmisións rústicas”.

Recorda o concelleiro nacionalista como “dende o ano 2011, o goberno municipal chegou a cobrar este imposto con efeito retroactivo de ata catro anos, co que moitos veciños e veciñas tiveron que facer fronte a cantidades desmesuradas por este conceito”. Eis baseábase a boa xestión do goberno municipal.

Xoán Carlos González remata na súa nota salientando “que atopámonos ante un claro exemplo de incapacidade de gobernar Redondela, por falta de proxecto, e incapacidade de xestionar, por facelo baseándose neste imposto”.

Ante un numeroso grupo de veciños e veciñas, o voceiro municipal, Xoán Carlos González, presentou o Acto recordando algunhas das reivindicacións que levan anos aparcadas pola Xunta de Feijóo en Redondela. “Melloras nos colexios de Santa Mariña e Quintela; recuperar San Simón como referente da memoria histórica”, apostando por dinamizar o Camiño Portugués, ou a posta en marcha dun tren de cercanías, recuperando a feira do gando. Considerou “unhna vergonza manter pechado o Centro de Día de Cesantes, catro anos despois do seu remate; ou que Feijóo diga en Vigo que pretender converter en vía urbana a AP-9 en Teís, cando os veciños e veciñas de Chapela están a sufrir unha ampliación inútil, ante o silencio do alcalde Javier Bas”.

Jessica García, integrante da candidatura do BNG, responsábel comarcal de Galiza Nova, veciña de Vilar, dirixíuse aos persoas que asistiron a Acto Público na tarde do domingo, afirmando que “o goberno galego está a expulsar anualmente a 25.000 mozos e mozas ben preparados. Imos desenvolver un programa específico, dende o goberno galego para que Retornen á súa terra”. Destacou a necesidade de mellorar os servizos públicos, recordando como “eu pertencín á xeración de alumnado, que co bipartito desfrutou da gratuidade dos libros de texto. Do primeiro co que acabou Feijóo ao chegar ao goberno”.

A seguinte en participar no Acto da Alameda, foi Olalla Obelleiro, candidata do BNG, concelleira en Soutomaior. Centrou a súa intervención referíndose a que “os sectores productivos do noso País teñen futuro, e poden crear riqueza para os galegos e galegas. O que nos falta é un goberno que realmente aposte por eles”. Pedíu o voto útil para Galiza e para o pobo galego, apoiando ao BNG o 25 de setembro.

Luís Bará, candidato número 1, concelleiro de mobilidade no goberno municipal da cidade de Pontevedra pedíu o voto para o BNG, “porque se trata do voto que realmente lle fai dano ao PP, posto que vai servir para desbancalos do poder, e porque presentamos un verdadeiro Proxecto de País”. Na súa alución ante os alí congregad@s, puxo o exemplo do “aire novo que significa a presenza do nacionalismo nos gobernos municipais, ou mesmo da Deputación, o que leva a que os nosos deputados sexan ameazados de morte, ante o silencio cómplice de Feijóo”.

A continuación referíuse Bará, ao compromiso do BNG, en desaloxar ao PP da Xunta, para desenvolver políticas novas “como sempre fixo”. Recordou que se a dereita sae afortalada dos diferentes comicios, é porque PSOE e Podemos, están a xogar en función dos seus intereses de partido.

Ao longo da súa intervención asegurou que “existen potencialidades e recursos para poñer Galiza ao nível do resto do Estado”. Falou da capacidade de aforro dos galegos e galegas, que deber reinvertirse no noso País; do apoio a Proxectos Empresariais, do fomento dos nosos recursos e sectores productivos, “prantando cara ante Madrid e Bruxelas, aínda que nos inhabiliten para que mariñeiros, gandeir@s, teñan futuro”. “Recuperaremos a inversión en investigación, ao contrario do que fixo Feijóo, despedindo aos nosos investigadores e investigadoras”. Comprometeuse, o cabeza de cartel polo BNG, a crear, dende o goberno galego unha Banca Pública, recadar os nosos impostos ademáis de “afondar no autogoberno para que non teña que vin ninguén de fóra a dicirnos o que temos que facer”.

Finalmente pedíu o voto para o BNG, “como único voto comprometido e útil para Galiza” 

Houbo que agardar ata o ano 2006, trinta anos de “democracia”, para que o goberno galego cumprira coa obriga de recuperar a memoria dos perseguidos e perseguidas polo franquismo. Coa presenza do BNG naquel goberno, instaurouse o Ano da Memoria, converténdose San Simón se convertera en Illa da Memoria, espazo de encontro e reconciliación cos perseguidos e perseguidas.

Daquela, arredor de 20.000 visitantes anuais achegábanse ata este enclave empregado durante a Guerra e anos posteriores, como campo de concentración. Houbo que agardar a que o nacionalismo asumira responsabilidades no goberno galego, para que se restablecera a xustiza, rendendo homenaxe á memoria dos represaliados e as súas familias.

Os oito anos de goberno de Feijoó, serviron para que este compromiso encetado dende o goberno galego, fose paseniñamente eliminado. A Illa da Memoria, como tal, despareceu, posto que a recuperación da memoria histórica, nunca foi unha prioridade do PP.

Diante da celebración da Eleccións Galegas, o 25 de setembro, o BNG- Nós Candidatura Galega comprometeuse por medio da súa cabeza de lista por Pontevedra, Luís Bará, a  recuperar San Simón como Illa da Memoria. O obxectivo: recoñecer o papel individual e colectivo daqueles que mesmo pagaron coa súa vida para defenderen a causa da democracia e a liberdade. Ante o silenciamento ao que o veu sometido a dereita durante décadas, cómpre rescatalos do esquecemento.

Cómpre actuar decididamente dende o goberno galego, para sacar á luz todo sobre un dos capítulos máis escuros da nosa historia. O compromiso do BNG para que despois de setenta anos, as persoas que sufriron persecucións, violacións, asasinatos, exilio, … restitúa a súa memoria. O compromiso do goberno do BNG, para que San Simón volva a recuperar o seu protagonismo como elemento de coñecemento do noso pasado, para afortalar o noso futuro. Na nosa man está, o 25 de setembro, de poñer ao fronte do goberno galego a Ana Pontón, e Luís Bará para acadar este obxectivo.